स्याङ्जा, छोरी जन्माउने आमालाई समाजले हेर्ने दृष्टिकोण अझै परिवर्तन नभएको भन्दै स्याङ्जाको गल्याङ नगरपालिकाले छोरीको जन्मदर बढाउन ‘नगरकी छोरी’ कार्यक्रम सुरु गरेको जनाएको छ ।
गल्याङ नगरपालिका उपप्रमुख हेमा न्यौपाने तिमिल्सीनाले वडा नम्बर ३ का मिना दर्जीकी आठ दिनकी छोरीको नाममा गरिमा विकास बैङ्कमा खाता खोलेर कार्यक्रमको शुभारम्भ गर्नु भएको हो ।
छोरी जन्माउने आमालाई समाजले हेर्ने दृष्टिकोण अझै परिवर्तन नभएको र पछिल्लो समय छोरीहरूको जन्मदर कम हुँदै गएको भन्दै पालिकाले यस्तो कार्यक्रम सुरु गरेको हो ।
कार्यपालिका बैठकले महिला सशक्तीकरणको कार्यक्रम अन्तर्गत चालु आर्थिक वर्षमा जन्मेका छोरीहरूका लागि बैङ्क खाता खोलेर ५ हजार रुपैयाँ दिने निर्णय केही हप्ता अगाडी गरेको थियो ।
पालिकाले छोरीका नाममा खाता खोलेर राखिदिएको पाँच हजार रुपियाँ छोरी अठार वर्षकी भएपछि मात्रै झिक्न मिल्ने व्यवस्था गरिएको पालिकाले जनाएको छ ।
_1.jpeg)
