असार १५ । स्याङ्जामा पहिरोले एकै परिवारको आमा छोरीको ज्यान गएको छ । शुक्रवार मध्यरातमा गएको पहिरोले फेदी खोला गाउँपालिका वडा नं.-०५ बाँगे स्थित दुर्गा जी.टी. को ढुङ्गा माटो र टिनले छाएको घरमाथि पहिरो खस्दा सुतिरहेको अवस्थामा दुई जनाको ज्यान गएको हो ।
घरमा सुतिरहेको अवस्थामा ३१ वर्षीय दुर्गा जी.टी. र निजकी ३ वर्षीय छोरी निसिका जी.टी. को घटनास्थलमा नै ज्यान गएको स्याङ्जाका प्रहरी नायव उपरीक्षक इन्द्र बहादुर रानाले जानकारी दिए ।
घरभन्दा २५ मिटर माथि बाट अविरल वर्षाको कारण पहिरो आई घर/गोठ पूर्ण रूपमा पुरिएको छ । साथै घर नजिकै रहेको गोठमा रहेको १ भैँसी समेत मरेको स्थानीयले जनाएका छन् ।
त्यस्तै बागलुङको गलकोट नगरपालिका–८ काँडे बाँसको बिसौनामा गए राती गएको पहिरोले पुरिएर दुई जनाको ज्यान गएको छ ।
घर माथिबाट खसेको पहिरोले घर पुरिँदा ५५ वर्षीय प्रेम विक र उनकी श्रीमती ५० वर्षीय वसन्तीको ज्यान गएको हो ।
जिल्ला प्रहरी कार्यालयका प्रहरी उपरीक्षक ऋषिराम कँडेलले दिएको जानकारी अनुसार अहिले घटनास्थलमा प्रहरी टोली पठाइएको छ ।
_1.jpeg)
