.jpg)
पोखरा , साउन २० गते । कास्की प्रहरीले इन्स्योरेन्सको रकम पाउने आशामा आफ्नै पसलमा आगो लगाउने व्यक्ति सहित दुई जनालाई पक्राउ गरेको छ ।
पोखराको लेकसाइडस्थित मुक्तिनाथ सपिङ सेन्टर नामको आफ्नै सटरमा गत साउन १६ गते राति आगो लगाउने उक्त पसलका सञ्चालक र उक्त कार्यमा उक्साउने अर्का एक जनालाई प्रहरीले पक्राउ गरेको हो ।
उक्त पसल सञ्चालक स्याङ्जा आँधी खोला वडा नं. ४ का ३६ वर्षीय सुजन गहतराज र उक्साउने ४३ वर्षीय पवन नेपाललाई पक्राउ गरेर प्रहरीले आज सार्वजनिक गरेको हो । आगलागीको घटनाक्रम केलाउँदै जाँदा बिमा रकमकै प्रलोभनमा परेर आफ्नै पसलमा आगो लगाउने निर्णयमा पसल सञ्चालक पुगेको प्रहरीको अनुसन्धानबाट खुल्न आएको हो ।
डा. थानेश्वर पहारीको घरमा पवित्रा अधिकारीको नाममा सञ्चालनमा रहेको उक्त पसल रहेको सटरमा बुधवार राति करिब २ बजे तिर आगलागी भएको थाहा भएपछि स्थानीय र प्रहरीको सहयोगमा आगो नियन्त्रणमा लिइएको थियो ।
सञ्चालकले उक्त पसल न्यूरोडस्थित हिमालयन एभरेस्ट इन्स्योरेन्स लिमिटेडबाट २ करोड १० लाख बराबरको बिमा गराएका थिए । साथै आगो लागेको भनी पसलमा गत साउन १७ गते बिमा दाबीको मागका लागि गहतराजले निवेदन पेस गरेका थिए ।
_1.jpeg)
