शुक्रवारको प्रदर्शनमा तीनकुने र कोटेश्वर क्षेत्रका सडकमा तोडफोड र आगजनी भएको थियो। महानगरले वातावरण संरक्षण ऐन २०७७ र आर्थिक ऐन बमोजिम ८ वटा पत्र काटेर पूर्वराजालाई जरिवाना गर्ने निर्णय गरेको हो।
यसअनुसार, कोटेश्वर, महादेवस्थान, तीनकुने, जडीबुटी, बालकुमारी र सिनामंगल क्षेत्रका सडक तथा सडकपेटीमा जथाभावी फोहोर फालिएको भन्दै प्रत्येक स्थानका लागि १ लाख रुपैयाँका दरले कुल ६ लाख रुपैयाँ जरिवाना गरिएको छ। त्यस्तै, प्रदर्शनका क्रममा दमकल तोडफोड गरिएकाले १ लाख ३० हजार रुपैयाँ तथा तीनकुनेमा रुख, बिरुवा र रेलिङ तोडफोड गरिएकाले ६३ हजार रुपैयाँ जरिवाना थप गरिएको छ।
महानगरपालिकाले सार्वजनिक सम्पत्तिमा क्षति पुर्याउने कार्यको विरोध गर्दै दोषीहरूलाई कारबाही प्रक्रिया अघि बढाउने जनाएको छ। साथै, भविष्यमा यस्ता घटनाबाट वातावरण र सार्वजनिक संरचनाको सुरक्षाका लागि कडा निगरानी राखिने बताइएको छ।
_1.jpeg)
