.jpg)
चितवन राष्ट्रिय निकुञ्जका सूचना अधिकारी गणेशप्रसाद तिवारीका अनुसार दिनभरको प्रयास र थप हात्ती ल्याएर घेराबन्दी गरेपछि बाघलाई डार्ट गरिएको हो । जिल्ला प्रहरी कार्यालय चितवनका सूचना अधिकारी भेषराज रिजालले नियन्त्रणमा लिएको बाघ दुई मिटर ७७ सेन्टिमिटर लम्बाइको भाले बाघ भएको जानकारी दिए ।
आइतबार बिहान ५:२० बजे भरतपुर महानगर–२, बेलटाँडीका पशुपति श्रेष्ठलाई नारायणी नदी किनारमा बाघले आक्रमण गरेको थियो । आक्रमणपछि उक्त बाघ नजिकैको भरतपुर महानगर–१, नारायणगढ क्षेत्रको ढलको पानी प्रशोधनका लागि बनाएको नर्कट र केराको झाडीमा लुकेको थियो ।
बाघ खोजीका लागि प्रयोग गरिएका तीन हात्तीमध्ये दुई हात्ती बाघको गर्जनपछि भागेका र साँझ सौराहा क्षेत्रबाट थप दुई हात्ती ल्याएर खोजी कार्य सफल पारिएको थियो । दिउँसो भागेका दुई हात्तीमध्ये एउटा हात्ती भरतपुर–२६, सिसुवारमा फेला परेको तर अर्को हात्तीको खोजी भइरहेको छ । उक्त हात्ती भरतपुर–१९ पुगेको जानकारी निकुञ्जले दिएको छ । घाइते श्रेष्ठको भरतपुरस्थित चितवन मेडिकल कलेजमा उपचार भइरहेको छ ।
_1.jpeg)
