चैत ४, काठमाडौं — पछिल्लो समय बजारमा दालको मूल्यमा गिरावट आएको छ। नेपाल खुद्रा व्यवसायी संघका अनुसार विशेषतः रहरको दालको मूल्यमा उल्लेख्य कमी देखिएको हो।
संघले हरेक महिनाको १ गते र १५ गते दैनिक उपभोग्य खाद्यवस्तुहरूको खुद्रा मूल्य सार्वजनिक गर्दै आएको छ। यसअनुसार, फागुन १ गते प्रतिकेजी २६० रुपैयाँमा कारोबार भएको रहरको दाल चैत १ गते आइपुग्दा २० रुपैयाँ घटेर २४० रुपैयाँमा झरेको हो।
यस्तै, मासको दाल र चनाको दालको मूल्य पनि घटेको छ। मासको दालको मूल्य प्रतिकेजी २०० रुपैयाँबाट घटेर १९५ रुपैयाँमा झरेको छ भने चनाको दाल १८० रुपैयाँबाट घटेर १७५ रुपैयाँमा कारोबार भइरहेको संघले जनाएको छ।
तर, मुसुर दाल र मुङ दालको मूल्य भने स्थिर रहेको छ। मुसुर दाल दुई प्रकारका छन् — एक नम्बर र दुई नम्बर — जसको मूल्य क्रमशः १६५ र १५० रुपैयाँ प्रतिकेजी कायम छ। गेडा मुङ १७० रुपैयाँ र छाटा मुङ १८० रुपैयाँमै यथावत् रहेको छ।
संघले मूल्य घट्नुको कारण आयात लागत, माग घटेको अवस्था वा मौसमी आपूर्तिको असर हुन सक्ने अनुमान गरेको छ।
_1.jpeg)
