भक्तपुर सूर्यविनायक-२ बालकोटका ४१ वर्षीय अनिल थापालाई सीआईबीको डीएसपी भएको बताउँदै जबरजस्ती करणीको मुद्दा मिलाइदिने बहानामा ८ लाख ४० हजार रुपैयाँ ठगी गरेको अभियोगमा पक्राउ गरिएको हो। थापा हाल मध्यपुर ठिमी नगरपालिका-५ कमेरोटारमा बस्दै आएका थिए।
सीआईबीका प्रवक्ता प्रहरी उपरीक्षक युवराज खड्काका अनुसार थापालाई मंगलबार मध्यपुर ठिमीबाट पक्राउ गरिएको हो। उनलाई जिल्ला अदालत ललितपुरबाट सात दिनको म्याद थप गराई हिरासतमा राखिएको छ। थापा यसअघि २०७५ सालमा पनि ठगी र आपराधिक विश्वासघातको मुद्दामा पक्राउ परिसकेका थिए।
यसैबीच, आफूलाई सिआइडीका प्रहरी निरीक्षक र सहायक निरीक्षक भनी परिचय दिँदै ठगीमा संलग्न रामकुमार सापकोटा (३४), मकवानपुर थाहा-७ र ओब्जन चदारा (२८), बाजुरा बुढिनन्दा-३ लाई काठमाडौँको कीर्तिपुर ट्यांलाफाँटबाट मंगलबार पक्राउ गरिएको छ।
उनीहरूले दुबई पठाइदिने प्रक्रिया मिलाइदिने भन्दै ३० लाख ठगीमा परेका पीडितको पैसा उठाइदिने बहानामा ४ लाख ५० हजार रुपैयाँ ठगी गरेको उपत्यका अपराध अनुसन्धान कार्यालयले जनाएको छ।
नगद लिएको केही समयपछि पीडितलाई ग्लोबल आइएमई बैंकको २ लाख ५० हजार रुपैयाँको चेक दिए पनि चेक बाउन्स भएपछि पीडितले प्रहरीमा उजुरी दिएका थिए।
पक्राउ परेका दुवै जनालाई जिल्ला प्रहरी परिसर भद्रकालीमा पठाइएको छ।
_1.jpeg)
